Сейсенбі, 29 қаңтар күні қалалық әкімдікте Семей өңірінде ауылшаруашылық өндірісі кешенін дамыту мәселелері бойынша семинар-жиын өтті. Басқосуда салада атқарылған жұмыстар қорытындыланып, асыл тұқымды мал басын көбейту және субсидия алу мәселелері талқыланды. 2018-2020 жылдарға арналған ауылшаруашылық кешенін дамыту өңірлік бағдарламасын жүзеге асыру бойынша өткен жиынға облыстық Ауыл шаруашылығы басқармасының басшысы Асқар Жақыпбаев, қала әкімі Ермак Сәлімов, ауылдық округ әкімдері, шаруа қожалықтары басшылары қатысты.
Бүгінде Семей өңірінде ет пен сүт бағытындағы мал шаруашылығы мен өсімдік шаруашылығы басымдыққа ие. Қалалық ауыл шаруашылығы бөлімінің басшысы Нұрлан Шақабаевтың айтуынша, болашақта асыл тұқымды мал басын көбейту жоспарлануда. Бұл бағытта биыл шетелден 1100 бас аналық асыл тұқымды мал сатылып алынбақ.
— Семейге қарасты барлық ауылдық округтердегі шаруа қожалықтарының басшыларымен кездесіп, жұмыстарымен танысып шықтық. Бүгінде өңіріміз Өзбекстанға малды экспортқа шығарып отыр, — дейді Н.Шақабаев.
Жиында өсімдік пен мал шаруашылығын субсидиялау ережесіндегі өзгерістер туралы да айтылды. ШҚО Ауыл шаруашылығы басқармасының бөлім басшысы Ертай Қуанбаевтың сөзіне сүйенсек, елімізде ауыл шаруашылығы саласына көрсетілетін мемлекеттік қолдау жылдан-жылға оңтайланып келеді. Облысымыздың жалпы ішкі өнімінің алпыс пайыз-дан астамын құрайтын мал шаруашылығы қарқынды дамуда. Жалпы, аймағымыздағы мал шаруашылығы 6 бағытты қамтиды: етті бағыттағы ірі қара, сүтті бағыттағы ірі қара, жылқы шаруашылығы, түйе шаруашылығы, қой шаруашылығы, бал арасы шаруашылығы және құс шаруашылығы.
— Өткен жылы ірі қара малын сатып алуға қатысты заңға өзгерістер енгізілді. Шетелден асыл тұқымды ірі қара мал сатып алсаңыздар, оның ішіне Симментал тұқымы да бар, мал басына 225 мың теңгеден, отандық бұқалар сатып алсаңыздар, 150 мың теңгеден субсидия беріледі. Бұқаларды сатып алмай, 1000 бастан асатын мал бордақылау алаңдарынан жалға алуға да болады. Өз кезегінде бордақылау алаңы бұқаны бергені үшін Үкіметтен 100 мың теңге субсидия алады. Ал тауарлы шаруашылықтар 50 сиыры болса, 2 бұқасын жалға алып, Үкіметтен әр басына 10 мың теңгеден субсидия ала алады. Бұқа сатып алу қажеттілігі болмайды. Сүтті мал шаруашылығы бағытында өткен жылдан бастап селекциялық жұмыстар алынып тасталынды, — дейді ШҚО Ауыл шаруашылығы басқармасының бөлім басшысы Ертай Қуанбаев.
Ал өсімдік шаруашылығында заңға енгізілген өзгерістерге сәйкес, егіс науқаны кезінде сапалы тұқымдар тегін беріледі. Шаруалар күзгі жиын-теріннен кейін ғана 30 пайызын қайтаруы тиіс.
Жиында сондай-ақ шаруа қожалықтарын қаржы институттары арқылы несиелендіру мәселесі де қозғалды.
Жадыра ТӨЛЕГЕНҚЫЗЫ, «Семей таңы»{jcomments off}
