Бұл туралы қала әкімінің орынбасары Н.Шарованың прокуратура, полиция және оқу орындарының басшыларымен өткізген кездесуінде белгілі болды. Жиында кәмелетке толмаған жасөспірімдер арасындағы құқық бұзушылықтың алдын алу мәселелері қаралды. Елімізде кәмелеттік жасқа толмаған жасөспірімдер тарапынан жасалатын қылмыстар жиілеп кеткенін айтқан Надежда Шарова алдын алу жұмыстарын жандандыруды тапсырды.
Полиция басқармасының мәліметі бойынша, 2018 жылы қылмыстық құқық бұзушылық жасағаны үшін 114, әкімшілік құқық бұзушылық жасағаны үшін 916 жасөспірім жауапқа тартылған. Кәмелеттік жасқа толмағандарды бейімдеу орталығына 160 жасөспірім түсіп, арнайы мектептерге 5 бала жіберілген, ата-ана құқығынан айырылғандар саны 45.
Семей қаласының жергілікті полиция қызметі басшысының орынбасары Әділбек Нығманов, 2018 жылдың қорытындысы бойынша, кәмелеттік жасқа толмағандар арасындағы құқық бұзушылықты төмендетуге қол жеткізілгенін атап өтті. Орган қызметкерінің айтуынша, оларды жасөспірімдер арасында кәсіби деңгейде қылмыс жасайтындардың кездесетіні алаңдатып отыр.
Қалалық ішкі саясат бөлімінің басшысы Нұржан Есенжолов Жастар орталығымен бірге қаланың көңіл көтеру мекемелеріне рейд жүргізіліп жатқанын айтып, биылғы жылы «Жас сарбаз» жастар патрулін құру жоспарланып отырғанын жеткізді.
Жастардың негізгі міндеті полицейлерге патруль кезінде көмек көрсету болмақ. Сонымен қатар ішкі саясат бөлімі оқу орындарында құқықтық мектептер ашуды да жоспарлап отыр.
Кездесуді қорытындылаған Н.Шарова қала бойынша жасөспірімдермен алдын алу іс-шаралары атқарылып жатса да құқық бұзушылықтың азаймай отырғанына назар аударып, бұл бағыттағы жұмыстарды ширату керектігін баса айтты.
Семей ақпараттық орталығы.
{jcomments off}
