Өткен жұма, 1 ақпан күні Семей қаласының облыстық тарихи-өлкетану музейінде «Жәдігер жерде қалмасын» акциясы аясында «Көнеден жеткен көрік» атты кеш өтті. Шараны өткізудегі мақсат – жастарға қазақтың ұсталық өнерінің қыр мен сыры жайлы мағлұмат беріп, музейге өткізіліп отырған жәдігермен таныстыру.
Музейдің бұл жолғы көрмесі Тарбағатай өңірінің тумасы, ұста Кәлім Тілеубердіұлы пайдаланған ғасырдан астам тарихы бар жәдігер — көрікті таныстыруға арналды. Кештің шымылдығын Семей қаласының облыстық тарихи-өлкетану музейінің директоры Қайрат Сабырбаев ашты. Музей басшысы тарихи жәдігерді музейге тапсырып отырған Жұмаш Зарқымұлына алғыс білдіре келе, барлық жастарды «Жәдігер жерде қалмасын» акциясына атсалысуға шақырды.
— Ұсталық – ұшқан құстың қанаты, шапқан аттың тұяғы талатын ұлан-ғайыр жерге иелік еткен қазақ халқымен бірге жасап келе жатқан киелі өнер. Бабаларымыздың ел басына күн туған қиын-қыстау кезеңдерде пайдаланған қару-жарақтары, бейбіт күнде тұтынған тұрмыстық заттары, әшекей бұйымдары – барлығы темірден түйін түйген ұсталардың қолынан шыққан. Сол себепті қазақ халқы ұстаны ерекше бағалаған. Бұл кәсіпте шеберлерге серік болған құралдардың бірі — көрік,- дейді Қ.Сабырбаев.
Кәлім ақсақал пайдаланған жәдігерді музейге тапсырушы Жұмаш Зарқымұлы ауылшаруашылық техникасын жоғары дәрежеде меңгерген ұстаның шеберлігін, халқына адал қызмет еткенін атап өтті.
Көрік — халықтың ұсталық өнеріндегі ең қажетті құрал, бұл – темірді қыздыру үшін қолданылатын теріден жасалған үрлеуіш. Көріктің көмегімен оттыққа жел беріліп, түрлі металдар балқытылады. Көріктің қол көрік, қос көрік, мес көрік, аяқ көрік деген түрлері болған. Оның көлемі неғұрлым үлкен болса, оның көмейінен оттыққа берілетін ауаның қысымы да соғұрлым жоғары болады.
Кешті музей қызмет-керлері «Ер тұрман туралы трактат» атты өлеңмен қорытындылады.
Таңшебер ҚАЙРАНОВА, Шәкәрім атындағы мемлекеттік университеттің студенті.
{jcomments off}
