Елімізде жыл сайын дәстүрлі түрде 1-10 ақпан аралығында, Дүниежүзілік обырмен күрес күніне орай, республикалық онкүндік өтеді. Осыған байланысты Семей қаласының Ядролық медицина және онкологиялық орталығында баспасөз отырысы өтті.
Қаламызда онкологиялық аурулардың алдын алып, емдеу шараларын жүргізетін Ядролық медицина және окологиялық орталығы жұмыс істейді. Жоғары мамандандырылған радиалогиялық орталық, Семей, Курчатов қалаларымен қатар, алты ауданға қызмет көрсетеді. Өкінішке қарай, статистика бойынша Шығыс Қазақстан облысы қатерлі ісік ауруларына шалдығатындардың саны бойынша көш бастап тұр.
Мамандардың айтуынша, Қазақстанда өткен жылы обырдың 35 700 жаңа түрі тіркелген. Халық арасында «аты жаман ауру» аталып кеткен бұл дерт ер-азаматтарға қарағанда нәзік жандылардан жиі анықталады екен. Қатерлі ісік ауруларының ішінде алдыңғы қатарда сүт безі обыры болса, екінші орында өкпе мен асқазанның қатерлі ісігі тұр. Семей өңірінде онкологиялық ауруға 60-69 жас аралығындағы адамдар жиі шалдығады екен. Жыл сайын өңірімізде қатерлі ісіккпен ауыратын 1500-ден астам науқас тіркеледі. Олардың 40 %-ы дерті дендеп, асқынған кезде, яғни обырдың соңғы кезеңінде келеді.
Елімізде 2017 жылдан бастап обырды ерте кезеңнен анықтау мақсатында үш скринингтік бағдарлама жүргізіледі. Онколог дәрігерлердің айтуынша, қазір тексеру арқылы онкологиялық ауруларды алғашқы сатысында анықтап, емдеуге мүмкіндік тууда.
— Жатыр мойны обырын анықтау үшін әр төрт жыл сайын скринингтік тексеру жүргізіледі. Еліміздегі нәзік жандылар үшін бұл өте маңызды. Ал келесі скрининг әр екі жыл сайын сүт безі обырын анықтау үшін және ерлер мен әйелдерге 50 жастан бастап ректалды обырға тексеру үшін жүргізіледі. Бұл үш бағдарламаның қатерлі ісікті ерте анықтап, өлім-жітім көрсеткішін азайтуда көмегі зор екені әлемдік стандарттарда да жоғары деңгейде дәлелденген, — деді Семей қаласының Ядролық медицина және онкологиялық орталығының стратегиялық даму жөніндегі сектор меңгерушісі Татьяна Белихина.
Бір қуанарлығы, кейінгі кезде онкологиялық аурулардың арасында өлім-жітім көрсеткішінің төмендеуі байқалады. Бұл ретте қалалық онколог мамандардың тәжірибелілігі, сондай-ақ орталық дәрігерлерінің шет мемлекеттердің білікті мамандарымен тәжірбие алмасуы, денсаулық сақтау саласына арналған мемлекеттік бағдарламалар оң ықпалын тигізуде. Бүгінде қаламыздағы Ядролық медицина және онкологиялық орталық дәрігерлерінің обырды ерте сатысында анықтап, заманауи ем жүргізуге мүмкіндігі бар.
— Бүгінде орталықта қатерлі дертті емдеу үшін заманауи брахитерапия емі жүргізіледі. Бұл әдіспен емдеу кезінде радиацияның дозасы ем алушының басқа мүшелерінің зақымдануына жол бермей, қатерлі ісікке тікелей әсер етеді. Мұндай технология әлемнің барлық елдерінде қолданылады деп айта алмаймыз, — деді Семей қаласының мемлекеттік мидицина университетінің клиникалық және радиастанциялық онкология кафедрасының меңгерушісі, профессор Тасболат Адылханов.
Онкүндік аясында қаламыздағы Ядролық медицина және онкологиялық орталықта бірқатар іс-шаралар жоспарланған. Соның бірі — 9 ақпанда Ашық есік күні ұйымдастырылып, онколог дәрігерлер қаламыздағы 5 емхана мен Ядролық медицина және онкология орталығында тұрғындарды тегін қабылдайтын болады.
Әрбір адам үшін дертті асқындырып алмау өте маңызды. Сондықтан аурулардың алдын алу үшін Ашық есік күндерін пайдаланып, денсаулық жағдайын білу және скринингтік тексерулерден уақтылы өтіп тұру қажет.
Құралай ҚАЙЫРЖАНҚЫЗЫ, «Семей таңы»{jcomments off}
