Семейде коммуналдық қызметтер тарифі арзандағанымен, тұрғындардың айтуынша, биылғы жылдың қаңтар айында жылу мен ыстық судың ақысы өткен жылға қарағанда әлдеқайда жоғары болған. Семейліктерді толғандырған осы сауал төңірегінде апта сәрсенбісі, 13 ақпан күні баспасөз мәжілісі өтіп, қала әкімінің орынбасары Николай Ушаков, «Жылукоммунэнерго» МКК директоры Расылхан Жолдасов және «Семей — Водоканал» МКК директоры Еркен Сағандықов журналистер сауалына жауап берді.
Қала әкімінің орынбасары Николай Ушаковтың айтуынша, өткен 2018 жылдың 1 қаңтарынан бастап су үшін төленетін тариф 5 пайызға, ал жылу 1 қыркүйектен 2,7 пайызға төмендеген. Соған қарамастан қала тұрғындарының көпшілігі биылғы жылдың қаңтарындағы төлемнің өткен жылмен салыстырғанда артық екенін айтып шағымданған. Мамандар қаңтар айында жылу есебі көп болуының негізгі себебін өткен айда биылғы жылдағы ең төмен ауа райы көрсеткішінің тіркелуімен байланыстырады.
— Мұның басты себебі – қаңтарда күннің аязды болуы. Қазгидромет ұсынған ресми мәліметтерге көз жүгіртсек, 2018 жылдың 12 ақпанында топырақтың қатуы 45 см-ді құраса, биылғы жылдың 13 ақпанында 63 см болып отыр. Семейде 24 желтоқсаннан бастап аяз жүргенін баршамыз жақсы білеміз. Ал соңғы бір жұма көлемінде термометр көрсеткіші 34 градусқа дейін төмендеп, өткен аптада аяз 40 градусқа дейін жетті. Бұл күндері қазандықтар толық қуаттылықта жұмыс істеді,- деді Н.Ушаков.
Жылу тарифінің 2,7 пайызға төмендеуіне байланысты, биылғы қыс маусымында жылу мен ыстық су үшін төленген төлем өткен жылмен салыстырғанда 50 млн. теңгеге, ал «Семей — Водоканал» МКК абонеттік төлемі 3 миллион 750 мың теңгеге аз есептелініпті.
— Тариф төмендемей тұрып семейліктер 1 гигакалория жылу үшін 4134 теңге төлеп келсе, 1 қыркүйектен бастап 4020 теңгеге дейін арзандады. Яғни осыған дейін 1 шаршы метр 157 теңге болса, қазір 152 теңгеден есептелуде. Есептеуіш аспаптан көрсеткішті алу әр айдың 21-нен 23-не дейін жүзеге асырылады. Әр айдың басында өткен айдың түбіртектері толығымен таратылады. Тарифтегі өзгерістер туралы түбіртекте жазылған, — дейді «Жылукоммунэнерго» МКК сату бөлімінің басшысы Гауһар Жетпісбаева. Оның айтуынша, есептеуіш құрал орнатқан тұрғындар әлдеқайда аз төлем жасаған.
— Қазір қала тұрғындарының 84 пайызы есептеуіш құралды пайдаланады. Бұл — тиімді әдіс. Есептеуіш құрал қойылған тұрғындардан қаңтар айында 1 шаршы метр жылу орта есеппен 130-140 теңгеден, желтоқсанда 110 теңгеден, ал қазан және қараша айларында 60-70 теңгеден есептелінді. Жалпы жылу маусымын алып қарасақ, құрал қойылған абоненттерде төлем 30 пайызға үнемделген, — дейді Г.Жетпісбаева.
«Жылукоммунэнерго» МКК көмірмен толығымен қамтамасыз етілген. 5 ақпанға дейін күн сайын 35 вагон көмір келіп түссе, 7 ақпаннан бері қалаға тәулігіне 45 вагон көмір тасымалдануда.
— Қаланың оң жағалауындағы «Ғаббасова», «103» және «103 А», «Шіркеу», «35-квартал», «Зоовет-институт» қазандықтарында жылу мен ыстық су қуаттылығының жеткіліксіздігі байқалады. Яғни қала орталығы мен шет аймақтарында жылу қуаттылығы баяу. Сол себепті де осы аймақтарда ауа температурасы -27 градусқа төмендегенде, пәтердің едәуір салқындағаны сезіледі, — деген Николай Ушаков «103» жылу қазандығының істен шығуына қатысты да пікір білдірді.
— «103» жылу қазандығын жөндеуге қалалық бюджеттен қаржы бөлінді. Осы сенбіде пайданалуға беріледі. Сонымен қатар бірінші және төртінші қазандықтарды және «103А» қазандығындағы үшінші қазандықты жөндеуді жоспарлап отырмыз. Үшінші жылу қазандығының қуаттылығын арттыру мәселесін қараймыз. Бұл қазандық қалпына келтіріледі не болмаса жаңа жылу қазандығын орнату үшін жоба әзірлейміз. Ол 14 гКЛ орнына 20 кКЛ жылу бөліп, бу қазаны емес, су жылытатын қазан болады. Сондай-ақ 250-260 млн. теңге қаржыға «Зооветинститут» қазандығына қайта жөндеу жүргізіледі, — дейді Н.Ушаков.
Жадыра ТӨЛЕГЕНҚЫЗЫ, «Семей таңы»{jcomments off}
