2019 жылдың 1 қаңтарынан бастап ҚР «Мемлекеттік сатып алулар туралы» Заңына өзгерістер енгізілді. Сейсенбі, 19 ақпан күні Семей қалалық әкімдігінде ШҚО бойынша Ішкі мемлекеттік аудит департаменті басшысының орынбасары Жәния Жүмжүменова кәсіпкерлермен және мемлекеттік қызметкерлермен кездесу өткізіп, заңға енгізілген өзгерістерді түсіндірді.
Елбасы 2018 жылдың 26 желтоқсанында «ҚР кейбір заңнамалық актілеріне мемлекеттік сатып алу және квазимемлекеттік сектор субъектілерінің сатып алу мәселелері бойынша өзгерістер мен толықтырулар енгізу туралы» Заңға қол қойды. Заң 2019 жылдың 1 қаңтарынан бастап қолданысқа енді. Заңды іске асыру үшін Қаржы министрлігі Мемлекеттік сатып алулар Ережелеріне өзгерістер енгізді.
— Биылдан бастап мемлекеттік сатып алу саласында көптеген өзгерістер қолданысқа енді. 2019 жылғы 1 қаңтардан барлық мемлекеттік сатып алулар веб-порталда мемлекеттік сатып алулар туралы заңнамаға енгізілген жаңа түзетулерге сәйкес жүзеге асырылады. Енді мемлекеттік сатып алу порталында сатып алуға қатысатын кәсіпкерлер goszakup.gov.kz порталы қызметі үшін ақы төлейтін болады. Сатып алу қорытындысымен келіспегендер бұрынғыдай қалағанынша шағымдана алмайды. Бір көзден сатып алудың шекті сомасы 100-ден 500 айлық есептік көрсеткішке дейін өседі. Бұл маңыздылығы аз жұмыстар мен қызметтер бойынша сатып алу рәсімдерін айтарлықтай жеңілдетеді. Бұл норма бюджеті шағын тапсырыс берушілерге қатысты. Заңға сәйкес, осы норма 2021 жылға дейін қолданылады. Бұл ауыл әкімдіктерінің мемлекеттік сатып алуларды өткізу бойынша тәжірибелерін қалыптастыру үшін енгізілді. Бұған қоса баға ұсыныстарын сұрату кезінде тапсырыс берушілерге тауарлардың фирмалық атауларын көрсетуге құқық берілді. Бұл сапалы тауарларды сатып алуға мүмкіндік береді,- деді ШҚО бойынша Ішкі мемлекеттік аудит департаменті басшысының орынбасары Жәния Жүмжүменова.
Заңда «демпингтік баға» ұғымына және оған жол бермеуге нақты түсінік берілген. Ережеге сәйкес, конкурсқа қатысушылар құрылыс-монтаж жұмыстары бойынша шекті өлшем — 10%, жобалық-сметалық құжаттаманы және техникалық-экономикалық негіздемені жобалау бойынша — 15%, техникалық қадағалау қызметтері бойынша 15%-ға дейін бағаларын төмендете алады. Бұл конкурстық баға ұсыныстарының теңдігіне әкеледі. Шартты бағалар тең болған кезде жұмыс тәжірибесі бар және салықты уақтылы төлеген компанияларға басымдық беріледі. Төленген салық сомасы бойынша жеткізушіні таңдау критерийі алғаш рет енгізілгенін атап өту керек.
— Сыбайлас жемқорлықты азайту мақсатында бір көзден сатып алудың үлесі қысқарды. Яғни, бір көзден сатып алудың 53 негізінен 5-еуі алынып тасталды. Атап айтқанда, табиғатты пайдалану құқығын сатып алу; бағалы қағаздарды, заңды тұлғалардың жарғылық капиталындағы үлестерді сатып алу; монетарлық қызметті, сондай-ақ Ұлттық қорды және Бірыңғай жинақтаушы зейнетақы қорының зейнетақы активтерін басқару жөніндегі қызметті жүзеге асыру үшін сатып алу; Үкімет бекіткен тізбе бойынша Қазақстанның халықаралық шарттарына сәйкес, сондай-ақ Қазақстанның мүшесі саналатын халықаралық ұйымдар қаржыландыратын инвестициялық жобаларды іске асыру шеңберінде жүзеге асырылатын тауарларды, жұмыстарды, көрсетілетін қызметтерді сатып алу; Қазақстан халқының мәдени мұра нысанын (тарих және мәдениет ескерткішін) сақтау жөніндегі жұмыстардың жүргізілуіне техникалық және авторлық қадағалау жүргізу бойынша көрсетілетін қызметтерді сатып алу түрлері бір көзден сатылып алынбайды. Тапсырыс берушілер сатып алу өткізілмеген жағдайда, қайта өткізуге міндеттелді,- дейді Жәния Дүйсебайқызы.
Жадыра ТӨЛЕГЕНҚЫЗЫ, «Семей таңы» {jcomments off}
