Апта басында Семейге Ұлттық кардиохирургия ғылыми орталығының төрағасы Юрий Владимирович Пя, Ұлттық нейрохирургия орталығының төрағасы Серік Қуандықұлы Ақшолақов, Травматология және ортопедия ғылыми-зерттеу институтының төрағасы Нұрлан Жұмағұлұлы Батпенов, сондай-ақ ШҚО денсаулық сақтау басқармасының басшысы Марат Шоранов, ШҚО әкімінің орынбасары Әсем Нүсіпова келіп, Семейдегі Жедел медициналық жәрдем ауруханасының базасымен танысты.
«Жүз мектеп, жүз аурухана» бағдарламасы аясында бой көтерген Семейдегі Жедел медициналық жәрдем ауруханасы ШҚО әкімі Даниал Ахметовтің қолдауымен жаңа медициналық технологиялармен жабдықталуда. Өткен жылы аурухана базасындағы 70 орынға арналған травматология және ортопедия бөлімі травматология және ортохирургия орталығы болып қайта құрылып, артроскопиялық ота жасауға арналған видеоэндоскопиялық кешен, иық артроскопиясына арналған Champion құралдары және басқа да хирургиялық жабдықтар сатылып алынған. Жаңа технологиямен жасалатын ота санын көбейту мақсатында орталықтың 3 маманы Лондон қаласындағы Kings College ауруханасында тәжірибеден өтіп қайтты.
Осы аурухана базасында биылғы жылдың бірінші тоқсанында Қазақстандағы алғашқы гибридті ота залы іске қосылмақ. Бұл бір ота залында бірнеше операция түрін жасауға, коронарлық синдромы және ми қан айналымының бұзылыстары бар науқастарға медициналық көмекті шұғыл және тиімді көрсетуге мүмкіндік бермек.
— ШҚО әкімі Даниал Ахметовтің тапсырмасымен аймағымызда Қазақстанның жетекші ғылыми-зерттеу орталықтарымен байланыс орнату жолға қойылып келеді. Биылғы жылдың қаңтар айында Даниал Кенжетайұлы Астанадағы Ұлттық кардиохирургия ғылыми орталығына, Ұлттық нейрохирургия орталығына, сондай-ақ Травматология және ортопедия ғылыми-зерттеу институтына барған іссапарында аймақтағы ауруханалармен әріптестік байланыс орнату туралы ұсыныс білдірген болатын. Орталық төрағалары аймақ басшысының ұсынысын қабыл алды. Кардиология, нейрохирургия, травматология салаларымен қатар, алдағы уақытта еліміздегі жетекші онкология және ана мен бала денсаулығын сақтау орталықтарымен әріптестік қарым-қатынас орнату жоспарымызда бар,- дейді ШҚО денсаулық сақтау басқармасының басшысы Марат Шоранов.
Травматология және ортопедия ғылыми-зерттеу институтының төрағасы Нұрлан Жұмағұлұлының айтуынша, Қазақстандағы тұңғыш травматология және ортопедия орталығы 2001 жылы Астанада ашылған, мұнда әлемнің жетекші елдерінің үздік тәжірибелері енгізілген.
— Біздің институт мамандары осында әлденеше рет келіп, орталықтың жабдықталуына жоғары баға берген еді. Бүгін бәрін өз көзіммен көрдім. Семейдегі травматология және ортохирургия орталығы ең соңғы және озық технологиялармен жабдықталыпты. Тек мамандар даярлауды қолға алу керек. Біз бұл бағытта жұмыс істейміз. Бүгін институт меңгерушісі осында қалып, семейлік пациенттің арқа омыртқасына ота жасайды,- дейді Нұрлан Батпенов.
— Республикада кардиология мен кардиохирургияны дамыту бағдарламасы қабылданғанына биыл тура он жыл болды. Бұрындары кардиохирургия тек Астана мен Алматы қалаларында қолжетімді болса, қазір бұл сала әр аймақта дамып келеді. Семейдегі Жедел медициналық жәрдем ауруханасында науқастар үшін көптеген мүмкіндіктер жасалуда. Кардиохирург, нейрохирург және травматолог маманның бір ота залында жұмыс істеуіне мүмкіндік беретін еліміздегі алғашқы гибридті ота залы осында ашылмақ. Мемлекет бюджеттен қомақты қаржы бөлгендіктен, біз қымбат құрал-жабдықтарды тиімді және орынды қолдана білуіміз керек,- дейді еліміздің бас кардиохирургі Юрий Пя.
Ал нейрохирург Серік Ақшолақовтың айтуынша, Семейдегі Жедел медициналық жәрдем ауруханасының болашағы зор.
— Шығыс Қазақстан шекаралық аймақта орналасқандықтан, мұнда медициналық туризмді дамытуға болады. Аймақтың медицина саласындағы жетістіктерін өзге облыстарға үлгі етеміз,- дейді нейрохирург.
Жадыра ТӨЛЕГЕНҚЫЗЫ, «Семей таңы»{jcomments off}
