29-30 наурыз аралығында Семей мемлекеттік медицина университетінде шетелдік медицина мамандарының қатысуы-мен «Политравма. Зақымданудың түрі мен ауырлығына байланысты медициналық көмек көрсетудің тактикасы және жарақатты диагностикалаудың көп салалы тәсілдері. Оңалту» атты республикалық ғылыми-тәжірибелік конференция өтті.
Қазақстан ТМД елдері арасында жол-көлік оқиғалары салдарынан қайтыс болған адамдардың саны жөнінен көш бастап тұр. Біздің елде жол апатынан болған өлім-жітім 100 мың адамға шаққанда шамамен 11,5 жағдайды құрайды.Тірек-қимыл аппаратының жоғары энергетикалық жарақаттарының арасында жол-көлік апаттарынан болған жарақаттар ерекше орын алады. Бұл ғылым тілінде политравма деп аталады. Политравма – зардап шегуші адамның органдарының немесе тіндерінің бірнеше жарақатына қатысты қолданылатын термин.
Екі күнге созылған республи-калық конференция барысында тірек-қимыл аппараты зақымданған науқасқа ауруханаға дейін және ауруханада көрсетілетін алғашқы медициналық көмек түрлері, жарақаттың түрі мен ауырлығына байланысты қойылатын диагноз бен медициналық көмек көрсету тактикасы, науқастарды оңалту шаралары, аралас жарақаттар жағдайындағы хирургиялық инновациялық әдістер және өзге де мәселелер жөнінде кеңінен айтылды.
Конференцияның бірінші күні әлемдік масштабтағы ең өзекті мәселелер — жоғары деңгейдегі аралас жарақаттарды емдеу, өлім-жітім саны мен политравма салдарынан болатын мүгедектікті азайту мақсатында жаңа технологияларды енгізу тақырыптары талқыланды. Бұл тақырыптар бойынша Түркия, Германия, Ресей және Қазақстан профессорлары баяндама жасады. Башкент университетінің ассистент-профессоры Bahtiyar Haberal егде жастағылардың сынықтарын емдеу шараларының қорытындысын клиникалық және радиологиялық талдаудың түрік еліндегі тәжірибесімен бөліссе, Бонн университетінің травматология клиникасы директорының орынбасары профессор Burger бірнеше баяндама оқып, көптеген жарақат алған науқастарды жүргізудің ережелері және оңалту шаралары жайлы тарқатып айтты.
Өз кезегінде Семей мемлекеттік медицина университетінің мамандары – кафедра профессорлары мен оқытушылары, университет госпиталінің дәрігерлері «Эпидемиология, клиника және жұлын жарақаттарын емдеудің әдістері», «Нейрохирургиядағы аралас жарақаттар», «Жүрек-ми жарақаттарының диагностикасы мен емдеу алгоритмі» және басқа да өзекті тақырыптарды қозғады.
Конференцияның екінші күні қорытынды пленарлық мәжіліс өтіп, Қазақстанда политравмалық орталықтар құрудың қағидалары, медициналық қателіктердің себептері мен салдарлары және аралас жарақаттардан болатын өлім-жітім статистикасы талқыланды. Интерн-дәрігерлер мен резидент-травматологтер травмато-логияның әртүрлі бағыттары бойынша баяндама жасады.
Конференция соңында салтанатты жағдайда Резолюция қабылданып, Қазақстандағы травматологиялық қызметті дамытудың нақты жоспары белгіленді.
Ж.САМАТ, «Семей таңы»{jcomments off}
