Қаламыздағы Орталық саябақта қайта құру және абаттандыру жұмыстары жүргізіліп, заманауи және жайлы демалыс орнына айналмақ. Бұл туралы жұма, 29 наурыз күні Орталық саябақта Семей қаласы әкімі Ермак Сәлімов, «ЭтноМұра» жобалау компаниясының қызметкерлері мен БАҚ өкілдері бас қосқан кездесуде мәлім етті.
— Біріншіден, саябақта көгалдандыру жұмыстары толығымен өзгереді. Бұл саябақтың салынғанына жүз жылға жуық уақыт болған. Орман патологиясына сәйкес, ағаштардың 90 %-дан астамы қартайған. Сондықтан мұнда көгалдандыру жұмыстары түгелдей қайтадан жүргізіледі: гүлдер, қылқан жапырақты ағаштар, арша, үйеңкі, қайың және шетен сияқты талдар отырғызылатын болады,- деді саябақтың жаңа бейнесін таныстырған «ЭтноМұра» жобалау компаниясы басшысының орынбасары Марат Жұмағұлов. — Біздің компания Еуропа елдерінен тәжірибе жинақтап, еуропалық технологиямен жұмыс істейді. Орталық саябақта тұрған жарықтандыру көздері ескірген. Сондықтан заманауи LED-жарықтандыру қойылады. Нәтижесінде түнде және кешкі уақытта қала тұрғындары мен қонақтары үшін өте жайлы әрі жарық болады, — деді М.Жұмағұлов.
Жобалаушылардың айтуынша, саябақта жастардың спортпен шұғылданулары үшін футбол, баскетбол, волейбол және скейт алаңдары құрылады, ал зейнеткер тұрғындар үшін шахмат тақталары орнатылады, сондай-ақ демалушылар үшін би алаңы да қарастырылады. Бүлдіршіндерге арналған заманауи ойын алаңдарының құрылысына табиғи материалдар мен жабдықтар қолданылмақ. Сонымен бірге мерекелік шараларды өткізуге арналған амфитеатр да салынады.
Саябақтың орталық бөлігін өзгертіп, заманауи субұрқақтар орнату жоспарланып отыр. Қала әкімі Ермак Сәлімов саябақтағы Шәкәрім Құдайбердіұлының ескерткіші мен азамат соғысының батырлары мемориалы сол қалпында қалатынын атап өтті.
Ал парк аумағында орналасқан барлық дүңгіршектерді өзге аймаққа көшіру жоспарлануда.
— Біз дүңгіршек иелерімен келісіп, оларды басқа орынға көшіретін болдық. Ал саябақ аумағында орналасқан ішімдік сататын дүкендер мен кафелерді отбасылық демалыс орындарына айналдыру керек. Әзірге мұндағы жекеменшік нысандарды бөліп тұратын қоршау жасаймыз. Бұл жерде біз тұрғындар үшін ыңғайлы әрі қауіпсіз демалыс орнын құрғымыз келеді,- деді қала әкімі Ермак Сәлімов.
Қайта құру жұмыстары таяу күндері басталады. Жоба бойынша, демалыс аймағын жаңғырту үш айға созылмақ. Жөндеу жұмыстары кезінде Орталық саябақ қақпасы жабылады.
Құралай ҚАЙЫРЖАНҚЫЗЫ, «Семей таңы»{jcomments off}
