Өткен жұма, 21 мау-сым күні баспасөз орталығында Көкентау ауылдық округінің әкімі Әбусана Бақдәулетұлы Қарсақбаев жергілікті БАҚ өкілдері алдында есеп берді.
2012 жылдан бері Көкентау ауылдық округінің әкімі болып қызмет етіп келе жатқан Әбусана Бақдәулетұлының айтуынша, 1900 жылы Ресейден, Украинадан қоныс аударғандар Знаменка атап кеткен ауыл ономастикалық комиссия шешімімен жуырда ғана Көкентау деп аталған.
Көкентау ауылдық округі тұрғындарының негізгі айналысатын кәсібі — мал шаруашылығы. Мұнда қазір 88 шаруа қожалығы бар. Семей өңірі бойынша мал басы саны жөнінен алдыңғы орында. Округте қазіргі күні 13 мың 886 бас ірі қара, 8140 бас жылқы, 4142 бас қой өсіріліп, асылдандыру жұмыстары жүргізілуде. Малды асылдандыру мақсатында 55 бас асыл тұқымды бұқа және 20 қошқар сатылып алынған. Бұл бағытта өткен жылы жергілікті бюджеттен 40 млн. 168 мың теңге қаржы бөлінген.
— Бұл тұрғындардың әрі қарай селекция жұмыстарымен айналысулары үшін берілген қаражат болатын. 2018-2019 жылдары селекциялық жұмыстар жүргізілді. Нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған бағдарламасы арқылы төрт тұрғын 4 пайыздық мөлшерлемемен 6 жылға арзандатылған несие алып, мал басын көбейтуге үлес қосуда. Шаруа қожалықтарын есептемегенде, ауыл тұрғындары жалпы саны 2000-нан астам ірі қара өсіріп отыр. Өткен жылы «Сыбаға» бағдарламасына енген өзгерістерге байланысты осы бағдарлама аясында «Тәңірберген» шаруа қожалығы Ресейдің Алтай өлкесінен 60 бас асыл тұқымды мал сатып алды. Мемлекет тарапынан мал жайылымдары үшін де көмек көрсетілуде. Осымен төртінші жыл қатарынан ауылдағы жайылымдық жерлерге су тартылып жатыр. Өткен жылы 12 млн. теңгеге15 құдық қазылды, — деді Ә.Қарсақбаев.
2017 жылы Елбасы тапсырмасымен ҚР Ауыл шаруашылығы министрлігінде кооперативтер құру мәселесі көтерілген болатын. Көкентау ауылдық округінде қазіргі күні «Қарасу» кооперативі жұмыс істеуде.
— Кооперативтің артықшылығы сол — тұрғындар малын біріктіріп, тіркеп, табынға бөліп бақтырады. Асыл тұқымды бұқа қосылады. Ауылда мал бұрын иесіз бағылса, қазір субсидия есебінен бақташыға жалақы төленеді. Халыққа да жеңіл, мал бағу үшін қалтасынан шығын шықпайды. «Қонысбек» атты шаруа қожалығы да кооператив құрып, өз жұмысын бастауда. Нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған бағдарламасы арқылы несие беру көлемін ұлғайтып, мал басын арттыру бағытында жұмыс істеудеміз. Биыл «Еңбек», «Сыбаға» бағдарламалары арқылы шет мемлекеттерден асыл тұқымды мал сатып алуға 5 шаруа қожалығы тапсырыс беріп қойды,- дейді округ әкімі.
Қазір Көкентау ауылдық округінде мектеп, дәрігерлік амбулатория, әкімшілік, шағын су мекемесі жұмыс істеп тұр. Өткен жылы 10 млн. теңге қаржыға футбол алаңы жасалып, орталық саябақ абаттандырылған.
Айта кетсек, Көкентау ауылы тарихи елді мекен болып саналады. Мұнда тасқа қашалған жазулар өте көп. Қазір Нұр-Сұлтан қаласынан келген мамандар қазба жұмыстарын жүргізіп жатыр.
Кездесу соңында округ әкімі алдағы жұмыс жоспарларымен бөлісті. Ә.Қарсақбаевтың айтуынша, осы жылдың екінші жартысында 6 ұңғыманы бұру, клуб ғимаратын жөндеу, балалар ойын алаңын орнату жұмыстары жүргізілмек, сондай-ақ музыкалық аспаптар сатып алу көзделуде.
Жадыра ТӨЛЕГЕНҚЫЗЫ, «Семей таңы»{jcomments off}
