Республикалық ардагерлер кеңесінің шешімі бойынша еліміздің әр аймағында «Қайран ерлер – қаһарман ардагерлер» атты фестиваль өтуде. Осыған орай қалалық Достық үйінде Семей қалалық ішкі саясат пен мәдениет және тілдерді дамыту бөлімдерінің, қалалық ардагерлер кеңесінің ұйымдастыруымен өткен фестивальде Семейдегі түрлі ұлттық ұйымдар өкілдері, әр саланың ардагерлері ән, би, мүшайра және аспапта орындау аталымдары бойынша өнерлерін көрсетіп, өзара сайысқа түсті.
Ұлттық құндылықтарды жастар арасында насихаттап, жастарды патриоттық тұрғыда тәрбиелеу және Ұлы Отан соғысының ардагерлеріне құрмет көрсету мақсатында өткен фестивальге қалалық ардагерлер кеңесінің төрағасы Амантай Доғалақовтың төрағалық етуімен қалалық мәдениет және тілдерді дамыту бөлімінің инспекторы Ардақ Қабышева, қалалық өнер ардагерлері кеңесінің төрағасы, композитор Қадыр Досымжанов және Мұқан Төлебаев атындағы музыкалық училищесінің хор дирижері Зухра Ғабитова сынды өнер, мәдениет саласының мамандары қазылық етті. Шара барысында тілшілерге сұхбат берген қазылар алқасының төрағасы Амантай Доғалақов:
— Ұлы Жеңістің 70 жылдық мерейтойына орай арнайы өткізіліп отыр-ған республикалық фестиваль 3 кезеңнен тұрады. Жалпы, шарада 55 жастан асқан ардагерлерге бақтарын сынауға мүмкіндік бар. Қалалық фестивальде 45 нөмір болады деп күтілуде. Соның ішінен ең үздік деп танылғандар алдағы мамыр айында Өскеменде өтетін облыстық фес- тивальге қатысады. Ал, облыстық фестиваль жеңімпаздары Елордасы Астана қаласының орталық алаңында келер жылдың 9 мамыры күні өтетін Ұлы Жеңістің 70 жылдық мерейтойына арналған салтанатты шеруде өнер көрсететін болады, — дейді.
Фестивальге қатысушылардың бірі -«Айша бибі» ұлттық-мәдени орталығының төрайымы Айман Боқбасарова ардагерлер үшін мемлекет тарапынан үнемі көңіл бөлініп, өздерінің өнерлерін көрсетуге осындай үлкен мүмкіндік беріліп отырғанына өз басы өте қуанышты екендігін жеткізді. Сонымен қатар, аталмыш ұлттық-мәдени орталық мүшелері егде жастағы адамдар болса да, сахнаға шығып, өнер көрсетуде алдарына жан салмайтынын тілге тиек еткен Айман Боқбасарова фестивальде жеңімпаз атану үшін аянып қалмауды да айтып, барлық қатысушыларға сәттілік тіледі.
{jcomments on}Амантай Айтмырзаұлының кіріспе сөзінен соң «Қазына» өнер ардагерлерінің қазақ фольклорлық ансамблі сахна шымылдығын ашты. Одан кейін күміс көмей, жезтаңдай әншілер мен мың бұралған бишілер өнерлерін ортаға салды.
Үзіліс арасында Қазақстанның еңбек сіңірген мәдениет қызметкері, композитор, дәстүрлі әнші Тұрсын-ғазы Рахимов сынды өнер майталмандары әннен шашу шашып, көрермендердің көңілін тасытты.
Түрлі ұлттық киімдерді киген ардагерлер қауымы шат — шадыман күй кешіп, осындай шараға қатысуға мүмкіндік алғандары үшін ұйымдастырушыларға ризашылықтарын білдірді.
Нұрдәулет КӘКІШЕВ,
«Семей таңы»
