Үржар ауданында Барқытбел атты ауылдық округ бар. Талдап, таразылап қарар болса, бекерге «Барқытбел» атанбаған тәрізді. Тарбағатайдың күнгейін қалың жұрт «Барқытбел» атап кеткенкені көпшілікке мәлім. Сірә, табиғатына тамсанып, таңдай қаққан болар. Осы Барқытбелдің бөктерінді бірлігін жарастырып, тірлігін келістірген, түтіні түзу ұшқан ауылда атқарылып жатқан оңды істердің куәсі болдық.
Ауылдық округтің орталығы Барқытбелге бет бұрып, бара қалсаңыз бірінші көзіңізге дәрігерлік амбулатория түседі. Өткен жылдың қоңыр күзінде халықтың игілігіне берілген денсаулық сақтау мекемесі бүгінгі күннің заманауи құрылғыларымен жабдықталып, қалтқысыз қызмет етіп тұр. Ауылдық округте Барқытбел ауылынан өзге үш Батпақты, Теректі, Некрасовка сияқты елдімекендер бар. Ауылдағы ағайынның басы ауырып, балтыры сыздай қалса, аудан орталығына сабылуға енді еш себеп жоқ десе де болады. Мұнда білікті дәрігерлер науқасқа барлық жағдайды жасап, дәрі – дәрмекпен ғана емес, жылы сөзімен де жігер береді.
Амбулаторияның бас дәрігері, білікті маман Роза Марлесқызы Саметбаева. Роза Марлесқызының айтуынша, бұ- рынғы дәрігерлік амбулатория таршылық етіп, келеңсіздіктер, бірқатар кедергілер де болыпты.
-Ескі амбулаторияда жеке кабинет деген жоқ болды. Ал қазір жағдайымыз басқа. Барлық талаптар сақталады. Кабинеттердің барлығы да құрылғылармен жабдықталған. Амбулаториядағы барлық құрылғыларды «Родекс» атты фирма орнатып, дәрігер – мамандарды құрылғылармен қалай жұмыс істеу керектігін толық үйретіп, көрсетіп берді. Мекеменің құрылысын іске асырған мердігер «Шарорда» ЖШС демеушілік ретінде құдық қазып, оған насос орнатып берді, — дейді Роза Саметбаева.
Ауылдың бас дәрігері өткен күндерді еске алады. Амбулатория бой көтермеген кезде, ауырып ем іздеп келгендер кезек күтіп далада тұратын кездер болыпты. Ал, қазір барлығы басқаша. Келген науқасқа барлық жағдай жасалған.
{jcomments on}Айтпақшы, маман тапшылығы жоқ мұнда. Тек зертханашы жағы болмаса. Бірақ, зертханашы жоқ деп қарап отырған жоқ. Аудан орталығы Үржардан зертханашылар арнайы келіп, сараптаманы алып, қорытынды нәтижесін жіберіп отырады.
Жалпы Үржар ауданында дәрігерлерге сұраныс күн санап артып отыр. Әлеуметтік – экономикалық тұрғыдан дамудың даң-ғыл жолына түскен аудан үшін әлбетте, бұл қалыпты құбылыс деп қарауға болады. Аудан әкімі Серік Зинабекұлы да Семей шаһарында Үржар ауданынан келіп оқып жатқан студенттермен жүздесіп, «Дипломмен ауылға» бағдарламасы бойынша дәрігерлерді елге қызмет етуге шақырған. Серік Зинабекұлы туған жерге қызмет етуге келетін түлектерге бағдарлама негізінде барлық жағдай жасалатындығын да сол кездесуде атап өткен болатын. Сәтін салса осы жылдан бастап дәрігерлердің жетіспеушілігі мәселесі біртіндеп шешілуі тиіс.
Емдеу мемекемісіне қайтып оралсақ. Амбулаторияда үш орынға арналған күндізгі стационар, оқшаулау, әйелдерге арналған екпе бөлмелері бар. Тіпті, ауылдың екінші жағына шығып, дәріханаға сабылып қажеті жоқ. Тұрғындар үшін қолайлы қылып, мекеменің ішінен дәріхана да жұмыс жасайды.
Амбулаториядағы «Алмаг — 2» аталатын магнитпен емдеу заманауи құрыл-ғысы жүйке жүйелері, құяң, жоғары тыныс жолдары, жүрек қантамырлары, ас қорыту жүйесі ауруларын емдеуге арналса, «Электрофорбес» аппараты – қабыну, іш – құрылыс, ішкі ағзаларға арналған.
Міне, Барқытбелдегі дәрігерлік амбулаторияның бүгінгі жұмысы осындай. Дер-тіне шипа іздей келген ауылдастарға ақ халатты абзал жандар заман талабына сай қызмет көрсетіп келеді.
