Бұл күнде атаулары ауыз толтырып, көргенде көз сүріндіретін түрлі сусындар көп. Шөліркегенде шөл басатынын қайдам, қазір жастардың барлығы осындай сусындарға әуес-ақ. Оның ағзаға әкелер зиянын зерделеп жатқанын және байқамадық. Бұл жағы тіпті бөлек әңгіме. Жарнамасы жер жарып, көгілдір экранның көркі болған сусындарды көріп отырған бір ақсақалдың осындайда қазақтың қымызына не жетсін шіркін деп бір жұтыныпты. Шөліңді қандырып, сарайыңды ашатын қымыздың қазір түрлі сусындардың қалтарысында қалып жатқаны көңіл шіркінге қаяу түсіретін бұрындары. Шүкір, қазір қазақ үшін қасиетті саналатын қымызға деген сұраныс күн артып келеді.
Қазақ үшін қымыз сапалы тағам ғана емес, сондай — ақ, шипалы сусын деп те есептеледі. Халық арасында қымызды көңіл күй сергектігі және ұзақ жасау сусыны деп текке атамаған. Қымыздың емдік қасиеті өз алдына бір әңгіме. Ата – бабаның байырғы сусыны саналатын қымыз өндірісін өрістету бұл күнде қарқынды іске асуда. Әсіресе, қазақтың жаны саналатын ауылда қазір бие байлап, саба піскен шаңырақтарды көптеп кездестіріп жүрміз.
«Жұмыспен қамтудың жол картасы — 2020» бағдарламасы аясында қымыз өндіруді қолға алғандардың бірі Үржар ауданы, Барқытбел ауылының тұрғыны Құрбанжан Уәлиолла атты азамат. Бие байлап, қымыз өндіруді қолға алған үржарлық азамат берері мол бағдарламаның қызығын көруде. Кәсіптің көзін, істің ебін таба білетін ол қазір өз ауылын қымызбен қамтамасыз етіп отыр.
Құрбанжан Уәлиолла атажұртқа келгеннен бастап, осы қымыз өндіруді көптен көздеп жүріпті. Көлемі 2 милллион теңге несиеге, 7 бие сатып алып, соның нәтижесінде міне, қымыз өндіруге біржола бел буған. Қазір «Құрбанжанның қымызы» десе ауыл ағайындары мақтауын асырып отырады екен.
— Ауылдастарым бие сауатынымды біледі. Өздері келіп тапсырыспен алып кетеді. Ата – бабамыздың айтуынша, қымызды көп ауруға ем деп естимін, сол халыққа ем болсын, деп ойлаймын. Келешекте сауындық жылқы басын көбейту жоспарым бар, — дейді Құрбанжан Уәлиолла.
{jcomments on}Қымыз өндіруге деген құмарлық қой. Құрбанжан ең бірінші осы іске бет бұрғанда бір ғана биесі болыпты. Бір биенің қымызы көрші – қолаңнан аспайтын болғандықтан, бие санын көбейтіп, ауылда қымыз өндіруге бел буыпты.
— Ауыл әкімі Нұрбек Әнуәрбеков осы кәсіпті қолға алуға кеңес берді. Бағдарлама бойынша несие алдым. Ойлаған ісім алға басып келеді. Жем – шөптен мәселе жоқ. Жергілікті әкімдік шабындық жер де берді. Қора – қопсымды түзедім, — дейді Құрбанжан.
— Бұйырса болашақта менің қымызым Үржар ауданының брендіне айналатынына сенімім кәміл деп отыр Құрбанжан. Қазір қазақтың той – домалағы да қымызсыз өтпейді. Кейде тапсырыс беретіндер кезек күтіп қалатын кездері де болады екен. Қазір Құрбанжан күніне қырық литр қымыз дайындап, сатуда. — Болашақта бие санын көбейтіп, бұл істі жандандыра беру жоспарымда, — дейді жігіт ағасы.
