Қалибек АЛТЫБАЙ, «Семей таңы»
Зайсан ауданында тірек ауылы қатарындағы үш ауылдың бірі — Дайыр. Облыс әкімі Бердібек Сапарбаевтың бастамасымен іске асып жатқан «Туған жерге – тағзым», «Туған жер – алтын бесігім» акциялары аясында тірек ауылдың әлеуметтік-экономикалық тұрғыда дамуына ерекше назар аударылып келеді. Аудан әкімі Алмас Оңдақановтың елді мекендердің уақыт ағымына сай дамып, өркендеуін назарда ұстап отырудың нәтижесінде аталмыш ауылда ауыз толтырып айтарлықтай нәтижелі жұ-мыстар бар.
Ағымдағы жылы «Жол қартасы» бағдарламасы негізінде Мүкарама орта мектебін ағымды жөндеуден өткізу және спорт алаңын салуға 65 млн. теңгенің үстінде қаражат бөлініп, оны жеке кәсіпкер А.Өтебаев сапалы атқарып шықты. «Ақбұлақ» бағдарламасына сәйкес Дайыр ауылындағы су жүйесін қайта жаңарту жұмыстарына биыл республикалық және жергілікті бюджеттен 324 млн. теңге қаржы бөлініп, 12 шақырымға су жүйесі тартылып, су сору станциясындағы ішкі су құбырларын тарту жұмыстары жалғастырылуда.
Бүгінде Дайыр ауылында 379 үй бар болса, оның 193-іне су кіргізілді. Ауылды абаттандыруға 1 млн. 280 мың теңге бөлініп, игерілуде. Салауатты өмір салтын қалыптастырып, бұқаралық спортты дамыту мақсатында футбол алаңы пайдалануға берілді. Ауылшаруашылық саласын дамыту бағытында бірқатар жобалар да іске асырылуда. Атап айтқанда «Қорған-төбе» шаруа қожалығы (жетекшісі А.Қожабаев) өз қаржысына 70 бас ірі қара және 4 бас асыл тұқымды бұқа сатып алса, «Арайлым» шаруа қожалығы (жетекшісі Ш.Сағатбек) өз қаржысымен 50 басқа арналған мал бордақылау алаңын ашты. «Айболат» шаруа қожалығы (жетекшісі М.Ақылбек) өз қаржысымен 100 басқа арналған мал бордақылау алаңын толық аяқтады. Жеке кәсіпкер Сағатбек Мамырбек өз қаржысымен күніне 4 центнерлік шағын май сығатын цех ашты.
«Жұмыспен қамту» 2020» бағдарламасы бойынша 5 кәсіпкер несие алды. Рамазан Елшібаев 3 млн. теңге несие алып, жиһаз жасайтын цех, Ләззат Қалқажаева 1 млн. теңгеге шаштараз ашып, Рауан Уажанов 2 млн. теңге қаржыға дөңгелек жөндейтін орын ашып, кәсіптерін дамытуды бастап та кетті. Ал, Зиядабек Жұманов 3 млн. теңге қаржыға 20 бас ірі қара сатып алды.
Көкжыра ауылынан кәсіпкер Аспанияр Батиха 3 млн. теңге несие алып, наубайханасын кеңейтті. 2014-2017 жылдары мал шаруашылығын асылдандыру, шаруа қожалықтарын ірілендіру, суармалы жерлерді тиімді пайдалану, субсидия алу, элиталық сортты тұқыммен қамтамасыз ету, ауылдарды абаттандыру, көркейту-көгалдандыру жұмыстары жоспарланған. Осы бағытта келер жылы Азамат Көмеков қымыз өндірумен, Толқын Қабыкен жылы жай салып, тұрғындарды жыл бойы көкөніспен қамтамасыз етуді көздеп отыр. Міне, бұлар Зайсан ауданының әлеуметтік – экономикалық көрсеткішін арттыруда өте қажетті шаралар десе де болады.
Келер жылы сәтін салса, ауылда су құбырына байланысты жұмыстар толық аяқталады. 2014-2015 жылдары Жамбыл, Дайыр, Көкжыра ауылдарына газ құбырларын тарту ісі қолға алынбақ. Дайыр ауылдық округінде ҚР Тұңғыш Президент күні мерекесі құрметіне орай Көкжыра ауылында аудандық бюджеттен бөлінген қаржыға салынған су тазалағыш станциясы іске қосылды.
Міне, бүгінгі Дайыр ауылының келбеті осындай. Алдағы жылдары ауылдың ахуалы аудан әкімінің тиісті тапсырмалары негізінде көркейе беретіндегіне ауыл тұрғындарының сенімі зор.
