Құрметті семейліктер!
Қадірлі қала қонақтары!
Тәуелсіздік – ел дамуының негізгі тірегі. Қазақстан мемлекеті егемендікке ие болған жылдар ішінде талай тарихи асуларды бағындырды. Елбасымыз Н.Ә.Назарбаевтың көшбасшылық ерекшелігінің арқасында көшіміз дамудың дұрыс жолына түсті. Әлемдік нарықтық қатынаста лайықты бағыт таңдап, экономикалық дағдарыс еңсерілді. «Қазақстан-2030» даму Стратегиясының барлық талаптары 15 жылда толық орындалды. Бәсекеге қабілетті 50 елдің қатарына қосылған Қазақстанның халықаралық деңгейдегі абыройы арта түсуде. Жаңадан бой түзеген Астана қаласы жаһандық басқосулардың орталығына айналды. «Қазақстан-2050» Стратегиясы қабылданып, алдыға ең дамыған 30 елдің біріне айналу мақсаты қойылды. «ЭКСПО» -2017» халықаралық көрмесін Астанада өткізуге қол жетіп отыр.
Мемлекет қуатының артуы өңіріміздің дамуына зор серпін беріп келеді. Семей халқының саны 340 мыңға жетті. Қала бюджетінің кіріс көзі жыл сайын 1 млрд. теңге мөлшерінде көбейіп келеді. Өнеркәсіп саласы биыл 130 млрд. теңгенің өнімін шығарды. Әлеуметтік және коммуналдық сұрақтар шешімі қарастырылған. Тұрғын үй құрылысы мен көшелерді абаттандыру көлемі ұлғайтылды. Мемлекеттік-әріптестік бағытында балабақшалар мен емханалар пайдалануға берілді.
Мәдениет пен өнерде, спортта да жетістіктеріміз зор. Қазақстан футболының 100 жылдығы халықаралық көлемде аталды. «Спартак» футбол командасы күміс жүлдемен бірге Жоғары лиганың жолдамасын ұтты. Жерлес спортшымыз Мерей Ақшалов бокстан Әлем чемпионы болып, Айбек Нұғымаров «Қазақстан барысы» атанды.
Құрметті жерлестер!
Тәуелсіздіктің әр жылы елімізді үнемі жоғары жетістіктерге жетелеп келеді. Толайым табыстардың бастауы болған Ұлттық мерекеміз -Тәуелсіздік күні баршаңызға жақсылық, құт-береке әкелсін!
Құрметпен, Семей қаласының әкімі Айбек Кәрімов.
Қалалық мәслихат хатшысы Бейсенбек Ақжалов.
