Сейсенбі күні Семей қаласының Шәкәрім атындағы мемлекеттік университетінде «Жаңа әлемдегі жаңа тарих — оқытудың қазіргі заман технологиясы» тақырыбында солтүстік-шығыс аймағы оқытушыларының семинар-кеңесі өтті. Кеңеске Астанадан келген ҚР БҒМ Ғылым Комитеті Мемлекет тарихы институтының бөлім меңгерушісі Ғани Қарасаев, осы институттың жетекші ғылыми қызметкері Дүйсен Сейтқали және шығыс өңірінің ғалымдары мен тарихшылары қатысты.
Әйгерім СӘРСЕНҒАЛИ,
Семей таңы,
-Тәуелсіздік күні қарсаңында ұйымдастырылып отырған семинарда Отан тарихының өзекті мәселелері мен теориялық тұжырымдары, болашақ зиялы ұрпақтарды қалыптастырудағы рөліне ерекше мән беріліп отыр. Сонымен қатар, Отан тарихын жаңаша зерделеу, мектеп оқулығынан бастап, жоғары оқу орындары студенттеріне арналған оқулықтарды қайта қарастыру бүгінгі күн тәртібіндегі мәселелер, — дейді семинардың мақсаты жайлы айтқан Семей қаласының Шәкәрім атындағы Мемлекеттік университетінің оқытушысы Қымбат Байсарина. Өткенге көз жүгіртпей, болашаққа жоспар құру мүмкін еместігі тағы бар. Бұл ойды нысанаға алған еліміз Отан тарихына ерекше көңіл бөліп отыр.
— Биыл Елбасының бастамасымен Отан тарихына ерекше көңіл бөлініп отыр. Елдің елдігі, халықты өзге жұрттың тануы оның тарихына байланысты. Қазақстан бүкіләлемдік қауымдастыққа мүше болғандықтан, мәдени, спорт, экономикалық жетістіктерімізді пайымдаған жұрт «бұл қандай халық?» деп ойлайды. Сол елді тану үшін тарихына үңіледі. Осы мәселелерді ескеріп, өз ұрпағымыз тарихымыздан тәрбие алсын деген мақсатта Қазақстан тарихын терең зерттеу қолға алынып жатыр,- деді Ғани Қарасаев.
«Отар елдің тарихын отарлаушы ел жазады» деуші еді ертеректе, бұл орайда егемен елдің Президенті өз тарихымызды ұлтын ұлықтай білетін, елінің болашағын ойлайтын өзіміздің тарихшылары жазсын деп тапсырма берді. Мемлекеттік хатшы Марат Тәжин: «Қазақстандық тарих ғылымының алдында нақты сын тұр», — деп, тарихшы ғалымдарға жүктелген тапсырманың көтерер жүгіне де аңғартқандай.
-Кеңес заманынан бері біздің тарихымыз кеңестік бағытта, көмекші тарих ретінде жазылды. Оның бәрін дәлелдеуіміз қажет. Тамырын тереңге тартқан тарихымызды Андронов мәдениетінен бүгінгі күнге дейін қайта жазуымыз керек. Біздің толық көшпелі халық емес, жартылай отырықшы халық болғандығымызды, 100-ден аса қалаларымыздың бол-ғандығын және қазақ халқының басқа еш жерден көшіп келмегендігін, ежелден осы жердің иесі мен киесі екендігін де және біздің отар ел болуымыздың себептерін зерттеуіміз керек,- деген Мемлекет Тарихы институты бөлім меңгерушісі жоғарыда аталған мәселелерді зерттеп, ақиқатын анықтау тарихшы мамандардың міндеті екендігін де айтып өтті.
Ұлтжанды ұрпақты тәрбиелеу үшін мектеп, университет бағдарламасында оқытылатын тарихқа көңіл бөлген абзал екендігін алға тартты жиын мүшелері. Сонымен қатар, баяндамашылардың айтуынша, тарихымыз жүйелі түрде жазылмаған. Сақ, Сармат дәуірінен үзіліп, Түркі дәуірінен қайта жалғасқан. Болашақта бұл кемшілік те толықтырылып, қайта зерттелетіндігі де осы кеңесте айтылды.
Елбасы тапсырмасымен бірқатар мәселелер жүзеге асырылуда. Дүйсен Сейтқали жаз маусымында студенттерге арнап еліміздің ғалымдары тізе қосып, екі хронологиялық оқулық жазып, қазіргі таңда Отандық тарихты жазу ісінде жүйелі жұмыстар жүргізіліп жатқандығын тілге тиек етті.
